miércoles, 6 de julio de 2016

CSI Feminismu



Área Feminismu

Na Corriente Sindical d’Izquierda sabemos que ye perimportante xunir toles lluches, porque toes formen parte d'un mismu sistema opresor, el patriarcal capitalista. Poro nun pue faltar un Área de Feminismu qu'evidencie la necesidá d'una conciencia de xéneru, diversidaes ya identidaes nun normatives, unida a la nuesa conciencia de clase.

El pelear polos drechos de les muyeres, y pola igualdá real de toles persones, nel ámbito llaboral y en tolos ámbitos de la vida, fae pernecesaria un área que centre la so actividá nestos obxetivos. Pa ello creyemos que la meyor ferramienta ye tener un espaciu d'alcuentru y alderique ente les muyeres de la CSI, nel que podamos compartir esperiencies, esmoliciones y retos. Un espaciu onde xuntanos y dende'l que facer y construyir les polítiques feministes de la nuesa organización, conciencienciando col trabayu a otres compañeres y a los compañeros, y faciendo que día ente día esta xera seya una parte más de toles estayes del sindicatu.

Mundu llaboral, desemplegu, educación, sanidá, servicios sociales, drechu a decidir sobre nuestres vides y nuestros cuerpos, …La llucha feminista ye una llucha que tien que ver con tolos aspeutos de la vida de les persones, y ye dende toos ellos que debemos trabayar.

Sabemos que l’acabar col machismu y con toles sos violencies nun tuvo ente les prioridaes nin de la izquierda en xeneral nin del sindicatu en particular. Güei vamos superando tolos prexuicios qu’esti sistema mos impón, rompiendo colos estereotipos y faciendo de toles lluches una sola. Por supuestu en comuña con otres organizaciones y movimientos sociales que tienen como oxetivu la igualdá de toles persones y la construcción d’una sociedá xusta.

Gracies la llucha feminista les muyeres tenemos güei los drechos que tenemos como muyeres. Nin naide nos regaló nada, nin los drechos cayeron del cielu, fueron y siguen siendo peleaos.

Les muyeres sindicalistes y feministes siguimos avanzando na llucha polos drechos de la clas obrera en xeneral y los drechos de les muyeres en particular. Prestaríanos que los cambios fueren más rápidos y que la nuesa llucha fuere más aceptada pero somos conscientes de la sociedá na que vivimos. Poro tenemos que siguir lluchando na cai y tamién dientro'l sindicatu, pa facer qu’ésti seya un auténticu motor de cambiu social.

Ya nun mos queda paciencia, ya nun podemos dir seliquino, son demasiaos sieglos de desigualdaes, demasiáu tiempu esperando que los nuesos derechos se reconozan, que les nueces voces nun se silenciencien.

Queremos que la CSI nun tenga miéu a dicir que ye un sindicatu de clas, combativu, asturianu y feminista. Nesti sen sabemos que vamos dexando atrás divisiones. Que cada día somos más persones les que entendemos que somos clas obrera, que tamos oprimíes y que la nuesa llucha escontra les inxusticies tien que ser global, ensin xerarquíes nin esclusiones. Y por supuestu tolos díes del añu y siempre en comuña, dientro y fuera les empreses, lluchando dende la base y la xenerosidá, avanzando nuna unidá obrera, popular y feminista, cola solidaridá como bandera.

Responsable del área: Mónica Jiménez

Contautu: muyeresenlluchacsi@gmail.com



Coleutivu Muyeres en llucha CSI

Colectivu que nació en el 2013 tomando el relevo de les compañeres qu’antes que nosotres habíen trayío la llucha feminista al sindicatu. Les muyeres que lu formamos somos una mezcla heteroxénea por edaes, emplegos en diferentes sectores, o ensin emplegu, esperiencia política,…El nuestru trabayu ye muy diversu, dende recuperación de la Memoria hestórica feminista, hasta talleres de llinguaxe inclusivu o diversidaes, pasando per charres, acciones de cai,… Centrándose dende va un par d’años na llucha escontra les violencies machistes, denunciando y visibilizando na cai (con concentraciones cada vez qu’hai un asesinatu machista) y, apoyando y acompañando a muyeres víctimes d’estes violencies.

El trabayu continuáu na cai fizo qu’otres muyeres que nun tan nel sindicatu alcontraren nesti colectivu un espaciu onde poder compartir y trabayar. Asina entre unes y otres apoyámonos y vamos caminando.

domingo, 3 de julio de 2016

PASUCAIS NEGRU CONTRA LA VIOLENCIA MACHISTA



Quien pueda qu'acuda con ropa negro.

Tamos en xunetu y esti añu ya son más de 60 les víctimes mortales de la violencia machista nel estáu español. Que sepamos, de xuru que son más. A éstes hai que suma-yos les hospitalizaes mui graves y toles demás muyeres maltrataes, prostituides, acosaes, discriniaes,...

Tamién queremos facer mención equí de les muyeres mayores y pequeñes refuxaes que día tres día a la vulneración de los sos drechos como seres humanos xuntase-yos la violencia contra elles pol fechu de ser muyeres, acosos, violaciones, palices,...

La violencia machista llueñe de sumir ta amontándose y como nun faigamos nada, como miremos pa otru llau munches vamos perder la vida nesta guerra declarada contra les muyeres.

Porque son munches les violencies machistes y hai que pone-yos frenu.

Por esto y por munches razones más queremos aprovechar la Selmana Negra y el gran arribación qu'ésta tien pa visualizar esta lacra social y glayar:

ACABEMOS COL MACHISMU Y TOLA SO VIOLENCIA
NUN DEBEMOS MIRAR PA OTRU LLAU
HAI MUNCHES VIDES EN XUEGU.

Ayudar a espublizar esti eventu y participa, toes y toos somos necesaries p'acabar col machismu.